Environment
വേഗത, മാരകമായ വിഷം, ആക്രമണ സ്വഭാവം ഈ മൂന്ന് കാര്യങ്ങളും കൂടിചേര്ന്നാല് ആ ജീവിയെ ബ്ലാക്ക് മാമ്പ എന്ന് വിളിക്കാം. ഭൂമിയിലെ ഏറ്റവും വേഗതയേറിയതും അപകടകാരിയുമായ പാമ്പായിട്ടാണ് ആഫ്രിക്കന് പാമ്പായ ബ്ലാക്ക്മാമ്പയെ കണക്കാക്കുന്നത്. പേര് പോലെ തന്നെ വളരെയധികം പ്രത്യേകതകളും ഈ പാമ്പിനുണ്ട്.
ബ്ലാക്ക് മാമ്പയ്ക്ക് മണിക്കൂറില് 12.5 മൈല് ( 20 കിലോമീറ്റര്) വേഗതയില് വരെ തെന്നി നീങ്ങാന് കഴിയും. എന്നാല് അതിന്റെ യഥാര്ത്ഥ ശക്തി അതിന്റെ വേഗതയില് മാത്രമല്ല ഇരയെ നിശബ്ദമായി പിന്തുടരാനുള്ള കഴിവിലും കൂടിയാണ്.
തെക്ക് കിഴക്കന് ആഫ്രിക്കയിലെ സമതല പ്രദേശങ്ങളിലും പര്വതപ്രദേശങ്ങളിലും കാണപ്പെടുന്ന ഈ പാമ്പ് ആഫ്രിക്കയിലെ ഏറ്റവും നീളമുള്ള വിഷപ്പാമ്പാണ്. ശരാശരി 8.2 അടി നീളവും പരമാവധി 14 അടി നീളവും വരെ അവ വളരുന്നു. ഏറ്റവും രസകരമായ കാര്യം അവയ്ക്ക് ഒലിവ് അല്ലെങ്കില് ചാരനിറത്തിലുള്ള നിറമാണെങ്കിലും അപകടം അറിയുമ്പോള് വായ തുറക്കുന്നതിനാലാണ് ഇതിനെ 'കറുത്ത മാമ്പ' എന്ന് വിളിക്കുന്നത്. അതായത് അവയുടെ വായയ്ക്കുള്ളിലെ നീലകലര്ന്ന കറുപ്പ് നിറമാണ് പ്രധാന പ്രത്യേകത.
ബ്ലാക്ക് മാമ്പ സാധാരണയായി മനുഷ്യരെ ആക്രമിക്കുന്ന പാമ്പല്ല. മറിച്ച്, മനുഷ്യനെ കണ്ടാല് ഒഴിഞ്ഞുമാറാനാണ് ആദ്യം ശ്രമിക്കുക. എന്നാല് രക്ഷപ്പെടാന് വഴിയില്ലെന്ന് തോന്നുകയോ ശത്രുക്കളാല് വളയപ്പെടുകയോ ചെയ്താല് ഇത് പ്രതിരോധത്തിലേക്ക് മാറും. അപ്പോള് തല ഉയര്ത്തി ശരീരത്തിന്റെ ഏകദേശം മൂന്നിലൊന്ന് ഭാഗം നിലത്തിന് മുകളില് ഉയര്ത്തുകയും ശക്തമായി ചീറ്റുകയും ചെയ്യും. പിന്നീട് തുടര്ച്ചയായി ആക്രമിക്കാനും കഴിയും.
ശത്രുക്കളാല് വേട്ടയാടുമ്പോള് ബ്ലാക്ക് മാമ്പയ്ക്ക് നിലത്തുനിന്ന് ഏകദേശം ഒരു മീറ്റര് വരെ തല ഉയര്ത്തി ഇരയെ ആക്രമിക്കാന് കഴിയും. എലികള്, വവ്വാലുകള്, പക്ഷികള്, പല്ലികള് തുടങ്ങിയ ജീവികളെ പെട്ടെന്ന് കണ്ടെത്താന്മാത്രം തീഷ്ണമാണ് ഇവയുടെ കണ്ണുകള്. വായയുടെ മുന്വശത്തുള്ള രണ്ട് പൊള്ളയായ വിഷപ്പല്ലുകള് ഉപയോഗിച്ചാണ് ഇവ വിഷം കുത്തിവയ്ക്കുന്നത്.
ബ്ലാക്ക് മാമ്പയുടെ വിഷം ലോകത്തിലെ ഏറ്റവും മാരകമായ പാമ്പുവിഷങ്ങളില് ഒന്നാണ്. ഒരു മനുഷ്യന്റെ ജീവനെടുക്കാന് വെറും രണ്ട് തുള്ളി വിഷം മതിയെന്നാണ് കണക്കാക്കപ്പെടുന്നത്. ഒരു ബ്ലാക്ക് മാമ്പയുടെ വിഷപ്പല്ലുകളില് 20 തുള്ളി വരെ വിഷം ഉണ്ടായേക്കാം. ഒരു കടിയില് ശരാശരി 100 മുതല് 120 മില്ലിഗ്രാം വരെ വിഷം പുറത്തുവിടാന് ഇതിന് കഴിയും. ഒരു മനുഷ്യന്റെ ജീവന് അപകടത്തിലാക്കാന് 10 മുതല് 15 മില്ലിഗ്രാം വിഷം മാത്രം മതിയെന്നാണ് വിദഗ്ധര് പറയുന്നത്.
ബ്ലാക്ക് മാമ്പയുടെ കടിയേറ്റാല് ആദ്യം വീക്കം അനുഭവപ്പെടാം. തുടര്ന്ന് നാവിന്റെയും താടിയെല്ലിന്റെയും ചലനനിയന്ത്രണം നഷ്ടപ്പെടുക, കാഴ്ച മങ്ങുക, പക്ഷാഘാതം, ആശയക്കുഴപ്പം എന്നിവയുള്പ്പെടെയുള്ള ഗുരുതര ലക്ഷണങ്ങള് പ്രകടമാകും. ചിലര് 45 മിനിറ്റിനുള്ളില് തന്നെ അബോധാവസ്ഥയിലാകാനും സാധ്യതയുണ്ട്. സമയബന്ധിതമായി ആന്റിവെനം ലഭിക്കാതെ വന്നാല് 7 മുതല് 15 മണിക്കൂറിനുള്ളില് മരണം സംഭവിക്കാം. ആന്റിവെനം ലഭ്യമായതോടെ മരണനിരക്ക് കുറഞ്ഞെങ്കിലും ആഫ്രിക്കയിലെ പല ഗ്രാമപ്രദേശങ്ങളിലും ഇന്നും അത് എളുപ്പത്തില് ലഭ്യമല്ല.
Content Highlights :The black mamba is the world's fastest and most dangerous snake. It slithers at a speed of 20 kilometers per hour. This snake has many unique characteristics, starting with its very name.